ലോകകപ്പ് ഫുട്ബോള്‍ 2022 മത്സരങ്ങള്‍ കാണാനുള്ള ടിക്കറ്റ് വിൽപ്പനയുടെ വിസൽ മുഴങ്ങി. ഇന്ന്മുതല്‍ ഫുട്‌ബോൾ പ്രേമികൾക്ക് ഓണ്‍ലൈന്‍ വഴി ടിക്കറ്റുകൾ ബുക്ക് ചെയ്യാം.
ജനുവരി 19 മുതല്‍ ഫെബ്രുവരി എട്ട് വരെ ആദ്യഘട്ടത്തില്‍ വിസ കാര്‍ഡ് ഉടമകള്‍ക്ക് ടിക്കറ്റ് വില്‍പ്പന ആരംഭിക്കുമെന്ന് ഖത്തര്‍ നാഷണല്‍ ബാങ്ക്, ഖത്തര്‍ ഇസ്ലാമിക് ബാങ്ക്, ദുഖാന്‍ ബാങ്ക് എന്നിവ ട്വീറ്റ് ചെയ്തിട്ടുണ്ട്.
പ്രിയതാരങ്ങളുടെയും,ടീമുകളുടെയും കളിക്കളത്തിലെ പ്രകടനം നേരിൽ കാണാനുള്ള ആരാധകരുടെ കാത്തിരിപ്പിന്‍റെ ആദ്യഘട്ടത്തിനാണ് ടിക്കറ്റ് വിൽപ്പനയിലൂടെ തുടക്കം കുറിച്ചിട്ടുള്ളത്.
ഖത്തര്‍ വിരുന്നൊരുക്കുന്ന ലോകകപ്പ് മാമാങ്കത്തിന്റെ ഗ്രൂപ്പ് നിര്‍ണയിക്കുന്നതിനുള്ള നറുക്കെടുപ്പ് ഏപ്രില്‍ ഒന്നിന് ദോഹയില്‍ നടക്കും. ഫിഫയുടെ വാര്‍ഷിക യോഗത്തിന് ശേഷമാകും നറുക്കെടുപ്പ്. 32 ടീമുകള്‍ പങ്കെടുക്കുന്ന അവസാനത്തെ ലോകകപ്പ് ടൂര്‍ണമെന്റ് കൂടിയാണ് ഖത്തറിലേത്. ആതിഥേയരായ ഖത്തറടക്കം 13 ടീമുകള്‍ ഇതുവരെ യോഗ്യത നേടി. യൂറോപ്പില്‍ നിന്ന് 10 ടീമുകളും ലാറ്റിനമേരിക്കയില്‍ നിന്ന് ബ്രസീലും അര്‍ജന്റീനയുമാണ് യോഗ്യത ഉറപ്പാക്കിയവർ.
യൂറോപ്പില്‍ ഇനി പ്ലേ ഓഫ് മത്സരങ്ങള്‍ മാത്രമാണ് അവശേഷിക്കുന്നത്. 8 സ്റ്റേഡിയങ്ങളില്‍ ഫൈനല്‍ നടക്കുന്ന ലുസൈല്‍ സ്റ്റേഡിയം മാത്രമാണ് ഇനി ഉദ്ഘാടനത്തിനായി കാത്തിരിക്കുന്നത്.
.jpg)
