കോഴിക്കോട് മെഡിക്കല്‍ കോളജിനു കീഴിലെ മാതൃശിശു സംരക്ഷണ കേന്ദ്രത്തില്‍ ആരംഭിച്ച മുലപ്പാല്‍ ബാങ്കിന്റെ (ഹ്യുമന്‍ മില്‍ക്ക് ബാങ്ക്) ഉദ്ഘാടനം ആരോഗ്യ മന്ത്രി വീണാ ജോര്‍ജ് നിര്‍വ്വഹിച്ചു.
മുലപ്പാലൂട്ടുന്ന അമ്മമാരിൽനിന്ന് മുലപ്പാൽ ശേഖരിക്കുകയും അത് ആവശ്യമുള്ള നവജാതശിശുക്കൾക്ക് നൽകുകയും ചെയ്യുന്ന സംവിധാനമാണ് ‘ഹ്യൂമൻ മിൽക് ബാങ്ക്’. ഡൽഹിയിലെ ലേഡി ഹാർഡിങ് മെഡിക്കൽ കോളജിലാണ് നിലവിൽ ഈ ‘ഹ്യൂമൻ മിൽക് ബാങ്ക്’. സംവിധാനമുള്ളത്.
കേരളത്തിലെ മെഡിക്കല്‍ കോളജുകളില്‍ ആദ്യത്തെ മില്‍ക് ബാങ്കാണിത്. പ്രസവം കഴിഞ്ഞ അമ്മമാര്‍, കുട്ടികള്‍ ന്യൂബോണ്‍ ഐ.സി.യുവിലുള്ള അമ്മമാര്‍, മുലപ്പാലൂട്ടുന്ന അമ്മമാര്‍, മുലപ്പാലൂട്ടുന്ന ജീവനക്കാര്‍, നവജാത ശിശുവിഭാഗം ഒ.പി.യിലെത്തുന്ന അമ്മമാര്‍ തുടങ്ങിയ മുലപ്പാലൂട്ടുന്നവരില്‍ സ്വമേധയാ മുലപ്പാല്‍ ദാനം ചെയ്യാന്‍ സമ്മതമുള്ളവരില്‍നിന്നാണ് പാല്‍ സ്വീകരിക്കുക. ഇവരില്‍ നിന്നും സമ്മതപത്രം വാങ്ങിയശേഷം ഇവര്‍ക്ക് സ്‌ക്രീനിങ് ടെസ്റ്റ് നടത്തി മറ്റ് അസുഖങ്ങളൊന്നും ഇല്ലെന്ന് ഉറപ്പുവരുത്തിയശേഷം ബ്രെസ്റ്റ് പമ്പ് ഉപയോഗിച്ച് പ്രത്യേകം ബോട്ടിലുകളില്‍ മുലപ്പാല്‍ ശേഖരിക്കും. രണ്ട് മുതല്‍ എട്ടു ഡിഗ്രി സെല്‍ഷ്യസ് വരെ താപനിലയില്‍ സൂക്ഷിക്കുകയും പാസ്ചുറൈസേഷന്‍ നടത്തി പ്രത്യേക സംഭരണികളിലേക്ക് മാറ്റുകയും ചെയ്യും. പാസ്ചുറൈസേഷന്‍ ചെയ്ത പാല്‍ അണുവിമുക്തമാണെന്ന് മൈക്രോബയോളജി പരിശോധനയിലൂടെ സ്ഥിരീകരിക്കും. ആവശ്യക്കാരായ കുഞ്ഞുങ്ങള്‍ക്ക് മുലപ്പാല്‍ നല്‍കും.
ചടങ്ങില്‍ തോട്ടത്തില്‍ രവീന്ദ്രന്‍ എം.എല്‍.എ അധ്യക്ഷനായി. എം.കെ രാഘവന്‍ എം. പി മുഖ്യാതിഥിയായി. മേയര്‍ ഡോ.ബീനാ ഫിലിപ്പ്, ആരോഗ്യവകുപ്പ് അഡീഷണല്‍ ചീഫ് സെക്രട്ടറി ഡോ.ആശാ തോമസ്, വാര്‍ഡ് കൗണ്‍സിലര്‍ കെ.മോഹനന്‍, സ്റ്റേറ്റ് മിഷന്‍ ഡയറക്ടര്‍ ഡോ.രത്തന്‍ യു.ഖേല്‍ക്കര്‍, ജില്ലാ കലക്ടര്‍ എന്‍.തേജ് ലോഹിത് റെഡ്ഡി, മെഡിക്കല്‍ കോളേജ് പ്രിന്‍സിപ്പാള്‍ ഡോ.വി.ആര്‍ രാജേന്ദ്രന്‍, ചൈല്‍ഡ് ഹെല്‍ത്ത് സ്റ്റേറ്റ് നോഡല്‍ ഓഫീസര്‍ ഡോ.ശ്രീഹരി എം, നാഷണല്‍ ഹെല്‍ത്ത് മിഷന്‍ ജില്ലാ പ്രോഗ്രാം മാനേജര്‍ ഡോ.എ.നവീന്‍, ആര്‍സിഎച്ച് ഓഫീസര്‍ ഡോ.കെ.മോഹന്‍ദാസ്, പീഡിയാട്രിക് വകുപ്പ് മേധാവി ഡോ.അജിത് കുമാര്‍ വി.ടി, നിയോനാറ്റോളജി വിഭാഗം മേധാവി ഡോ. അഷ്‌റഫ് ടി.പി, മാതൃശിശുസംരക്ഷണകേന്ദ്രം സൂപ്രണ്ട് ഡോ.സി.ശ്രീകുമാര്‍ തുടങ്ങിയവര്‍ പങ്കെടുത്തു.
.jpg)
