നീറ്റ് 2021: ഉടൻ അപേക്ഷിച്ചു തുടങ്ങാം; സിലബസ് വെട്ടിക്കുറയ്ക്കുമോ?

 

ഓഗസ്റ്റ് 1ന് നടത്താൻ നിശ്ചയിച്ചിരിക്കുന്ന നീറ്റ് മെഡിക്കൽ ഡെൻ്റൽ പ്രവേശന പരീക്ഷയുടെ അപേക്ഷാ ഫോമും ഇൻഫൊമേഷൻ ബുള്ളറ്റിനും ഉടൻ ഔദ്യോഗിക വെബ്സൈറ്റിൽ ലഭ്യമാക്കും

മെഡിക്കൽ പ്രവേശന പരീക്ഷയായ നീറ്റ് 2021 ന്റെ അപേക്ഷാ ഫോം ഉടൻ ലഭ്യമാകും. നാഷണൽ ടെസ്റ്റിംഗ് ഏജൻസി നീറ്റിന്റെ ഔദ്യോഗിക വെബ്സൈറ്റായ neet.nta.nic.in ആക്ടിവേറ്റ് ആക്കിയിട്ടുണ്ട്. അപേക്ഷാ ഫോമും ബ്രോഷറും ഉടൻ ലഭ്യമാകുമെന്നാണ് സൂചന.

മെഡിക്കൽ ഡെന്റൽ ബിരുദ കോഴ്സുകളിലേക്ക് നടത്തുന്ന പ്രവേശന പരീക്ഷയായ നീറ്റ് 2021 ഓഗസ്റ്റ് 1ന് നടത്താനാണ് തീരുമാനം. 11 ഭാഷകളിലായി പരീക്ഷ നടക്കും. മാർച്ച് 12നാണ് എൻ.ടി.എ ഇതു സംബന്ധിച്ച അറിയിപ്പ് പുറപ്പെടുവിച്ചത്.

ഒരു അംഗീകൃത ബോർഡിന് കീഴിൽ ഫിസിക്സ്, കെമിസ്ട്രി, ബയോളജി, ഇംഗ്ലീഷ് എന്നീ വിഷയങ്ങൾ പഠിച്ച് പന്ത്രണ്ടാം ക്ലാസ് ജയിച്ച വിദ്യാർത്ഥികൾക്ക് നീറ്റ് പ്രവേശന പരീക്ഷയ്ക്കായി അപേക്ഷിക്കാൻ യോഗ്യതയുണ്ട്. പന്ത്രണ്ടാം ക്ലാസ് ബോർഡ് പരീക്ഷയിൽ കുറഞ്ഞത് 50 ശതമാനം മാർക്ക് നേടിയിരിക്കണം. എന്നാൽ സംവരണ വിഭാഗക്കാർക്ക് ഇതിൽ ഇളവ് ലഭിക്കും.

നീറ്റ് ഓൺലൈൻ അപേക്ഷ എന്ന് ആരംഭിക്കുമെന്ന് ഔദ്യോഗിക അറിയിപ്പ് വന്നിട്ടില്ല. എന്നാൽ ഉടൻ അപേക്ഷിച്ചു തുടങ്ങാമെന്ന് വെബ്സൈറ്റിൽ നൽകിയിട്ടുണ്ട്. ടെസ്റ്റ്, സിലബസ്, വിദ്യാഭ്യാസ യോഗ്യത, പ്രായപരിധി, സംവരണം, സീറ്റ് കാറ്റഗറി, പരീക്ഷാ ഫീസ്, പരീക്ഷ നടക്കുന്ന നഗരങ്ങൾ, സ്റ്റേറ്റ് കോ‍ഡ് എന്നിവ വെബ്സൈറ്റിൽ പ്രസിദ്ധീകരിക്കും.