ആപ്പിൾ ഐഫോൺ 12

 

ഐഫോൺ 12 മാക്സ്, ഐഫോൺ 12 പ്രോ, ഐഫോൺ 12 പ്രോ മാക്സ് എന്നിങ്ങനെ നാല് മോഡലുകളാണ് പുത്തൻ ഐഫോൺ 12 ശ്രേണിയിൽ വില്പനക്കെത്തുക. ഈ മോഡലുകളെപറ്റിയെല്ലാം ആപ്പിൾ പൂർണമായും മൗനം പാലിക്കുകയാണ് എങ്കിലും പല വിവരങ്ങളും അനൗദ്യോഗികമായി പുറത്തായി കഴിഞ്ഞു. ഐഫോൺ 12 ശ്രേണിയെപ്പറ്റി ഇതുവരെ ലഭ്യമായ വിവരങ്ങൾ ചുവടെ ചേർക്കുന്നു.

ആപ്പിൾ ഐഫോൺ 12 - വില, ലോഞ്ച്

സാധാരണ ഗതിയിൽ സെപ്റ്റംബർ മാസത്തിലാണ് ആപ്പിൾ പുത്തൻ ഐഫോൺ ശ്രേണി വില്പനക്കെത്തിക്കുക. കൊറോണ വൈറസ് വ്യാപനം മൂലം സപ്ലൈ ചെയിനിൽ ഉണ്ടായ പ്രശ്നങ്ങൾ ഒരുപക്ഷെ ലോഞ്ച് ഒക്ടോബർ മാസത്തേക്ക് നീളാൻ സാദ്ധ്യതയുണ്ട്. ഐഫോൺ 12-ന് 749 ഡോളർ (56,205 രൂപ), ഐഫോൺ 12 മാക്സിന് 799 ഡോളർ (59,957 രൂപ), ഐഫോൺ 12 പ്രോയ്ക്ക് 1049 ഡോളർ (78,717 രൂപ), ഐഫോൺ 12 പ്രോ മാക്സിന് 1149 ഡോളർ (86221 രൂപ) എന്നിങ്ങനെയാണ് ഏറ്റവും കുറഞ്ഞ വില പ്രതീക്ഷിക്കുന്നത്.

ആപ്പിൾ ഐഫോൺ 12 - ഡിസൈൻ

ഐഫോൺ 5-ന് സമാനമായി മെറ്റൽ എഡ്ജ് ഡിസൈനിലേക്കുള്ള മടങ്ങിപ്പോക്കാവും ഐഫോൺ 12 എന്നാണ് ഏറ്റവും പുതിയ റിപ്പോർട്ടുകൾ. ഏറ്റവും വിലക്കുറവുള്ള മോഡൽ ആയ ഐഫോൺ 12-ന്റെ വലിപ്പം കുറയുകയും അതെ സമയം സ്ക്രീൻ ടു ബോഡി അനുപാതം വർദ്ധിക്കുകയും ചെയ്യും. ഇൻഫ്രാറെഡ് കാമറ, ഫ്ളഡ് ഇല്ല്യൂമിനേറ്റർ, ആമ്പിയന്റ് ലൈറ്റ് സെൻസർ, ഇൻഫ്രാറെഡ് കാമറ, ഡോട്ട് പ്രൊജക്ടർ എന്നിവയും പുത്തൻ ഐഫോൺ 12 ഫോണുകൾക്കുണ്ടാകും.


ആപ്പിൾ ഐഫോൺ 12 - ഡിസ്പ്ലേ

അടിസ്ഥാന മോഡൽ ആയ ഐഫോൺ 12-ന് 2340x1080 പിക്സൽ റസല്യൂഷനുള്ള 5.4-ഇഞ്ച് ഓഎൽഇഡി ഡിസ്പ്ലേ ആയിരിക്കും. ഐഫോൺ 12 മാക്സിന് 2532x1170 പിക്സൽ റസല്യൂഷനും 10-ബിറ്റ് കളർ സപ്പോർട്ടുമുള്ള 6.1-ഇഞ്ച് ഫ്ലെക്സിബിൾ ഓഎൽഇഡി ആവും. ഐഫോൺ 12 പ്രോയ്ക്ക് ഇതേ ഡിസ്പ്ലേ 120Hz റിഫ്രഷ് റെയ്‌റ്റോടെ ലഭിക്കും. ഏറ്റവും വിലക്കൂടുതലുള്ള ഐഫോൺ 12 പ്രോ മാക്സിന് 2778x1824 പിക്സൽ റസല്യൂഷനും 120Hz റിഫ്രഷ് റേറ്റുമുള്ള 6.7-ഇഞ്ച് ഓഎൽഇഡി ഡിസ്പ്ലേ ആയിരിക്കും.

ആപ്പിൾ ഐഫോൺ 12 - ഹാർഡ്‌വെയർ

ആപ്പിളിന്റെ പുറത്തിറങ്ങാനിരിക്കുന്ന A14 ബയോണിക് പ്രോസസ്സർ ആയിരിക്കും ഐഫോൺ 12 ശ്രേണിയുടെ കരുത്ത്. ക്വാൽകോം സ്നാപ്പ്ഡ്രാഗൺ 865+ പ്രോസസറിനോട് കിടപിടിക്കും വിധമാണ് ഈ പ്രോസസ്സർ തയ്യാറാക്കിയിരിക്കുന്നത്. 4 ജിബി റാമും 128 ജിബി/ 256 ജിബി സ്റ്റോറേജ് ഓപ്ഷനുകളിൽ ആവും ഐഫോൺ 12, ഐഫോൺ 12 മാക്സ് ഫോണുകൾ വില്പനക്കെത്തുക. അതെ സമയം 6 ജിബി റാമും 128 ജിബി/ 512 ജിബി സ്റ്റോറേജ് ഓപ്ഷനുകളിൽ ആയിരിക്കും ഐഫോൺ 12 പ്രോ, ഐഫോൺ 12 പ്രോ മാക്സ് ഫോണുകൾ വില്പനക്കെത്തുക. ആപ്പിളിന്റെ ആദ്യ 5ജി സപ്പോർട്ടുള്ള ഫോൺ ആയിരിക്കും ഐഫോൺ 12.


ആപ്പിൾ ഐഫോൺ 12 - കാമറ

ഐഫോൺ 12, ഐഫോൺ 12 മാക്സ് ഫോണുകൾക്ക് ഡ്യുവൽ-കാമറ സെറ്റപ്പും, ഐഫോൺ 12 പ്രോ, ഐഫോൺ 12 പ്രോ മാക്സ് ഫോണുകൾക്ക് ട്രിപ്പിൾ-കാമറ സെറ്റപ്പും ആയിരിക്കും. ലിഡാർ സ്കാനർ 3D കാമറ സംവിധാനം ഐഫോൺ 12 ഫോണുകൾക്കുണ്ടാകും എന്നും റിപ്പോർട്ടുകളുണ്ട്. മികച്ച ഒപ്റ്റിക്കൽ സൂമിനും, സ്മാർട്ട് എച്ഡിആർ മോഡിനുമായി പ്രോ മോഡലുകൾക്ക് പ്രീമിയം ടെലിഫോട്ടോ ലെൻസുകളുണ്ടാകും എന്നറിയുന്നു. ഇമേജ് സ്റ്റെബിലൈസേഷനായി സെൻസർ-ഷിഫ്റ്റ് ടെക്നോളജിയും ഐഫോൺ 12 ഫോണുകളിൽ ഇടംപിടിച്ചേക്കും.

ആപ്പിൾ ഐഫോൺ 12 - ബാറ്ററി

ഐഫോൺ 12-ന് 2,227mAh ബാറ്ററി, ഐഫോൺ 12 മാക്സിന് 2,775mAh ബാറ്ററി എന്നിങ്ങനെയാണ് റിപ്പോർട്ടുകൾ. പ്രോ മോഡലുകളായ ഐഫോൺ 12 പ്രോയ്ക്ക് 2,775mAh ബാറ്ററിയും, ഐഫോൺ 12 പ്രോ മാക്സിന് 3,687mAh ബാറ്റെറിയുമാവുമത്രെ. അതെ സമയം ഐഫോൺ 12-ന്റെ ബോക്സിൽ ചാർജർ ഉണ്ടാകില്ല എന്നാണ് റിപ്പോർട്ടുകൾ. ഐഫോൺ 12 വാങ്ങുന്നവർ ചാർജറിനായി വീണ്ടും പണം ചിലഴിക്കണം എന്ന് ചുരുക്കം.