ഥാര്‍: ലേലം നടപടി ചോദ്യം ചെയ്തുള്ള ഹര്‍ജി ഹൈക്കോടതി ഇന്ന് പരിഗണിക്കും

ഥാര്‍: ലേലം നടപടി ചോദ്യം ചെയ്തുള്ള ഹര്‍ജി ഹൈക്കോടതി ഇന്ന് പരിഗണിക്കും 

ഗുരുവായൂര്‍(Guruvayoor) ക്ഷേത്രത്തില്‍ മഹീന്ദ്ര വഴിപാടായി സമര്‍പ്പിച്ച ഥാര്‍(Thar) ലേലം ചെയ്ത നടപടി ചോദ്യം ചെയ്തുള്ള ഹര്‍ജി ഹൈക്കോടതി ഇന്ന് പരിഗണിക്കും. ഹിന്ദു സേവാ കേന്ദ്രം നല്‍കിയ ഹര്‍ജി ഹൈക്കോടതി(High Court) ദേവസ്വം ബെഞ്ചാണ് പരിഗണിക്കുക. 

ലേലം നടത്തിയത് ചട്ടങ്ങള്‍ ലംഘിച്ചാണെന്നും 5000 രൂപയില്‍ കൂടുതലുളള ഏത് വസ്തു വില്‍ക്കണമെങ്കിലും ദേവസ്വം കമ്മീഷണറുടെ മുന്‍കൂര്‍ അനുമതി തേടണമെന്ന വ്യവസ്ഥ ലംഘിച്ചെന്നുമാണ് ഹര്‍ജിയിലെ ആരോപണം. ഡിസംബര്‍ 18ന് നടന്ന ലേലത്തില്‍ ഒരാള്‍ മാത്രമാണ് പങ്കെടുത്തത്. 15 ലക്ഷം രൂപ അടിസ്ഥാന വിലയായി നിശ്ചയിച്ച് നടത്തിയ ലേലത്തില്‍ 15,10,000 രൂപയ്ക്ക് എറണാകുളം സ്വദേശി  വാഹനം സ്വന്തമാക്കുകയായിരുന്നു. 

ഥാർ അമൽ മുഹമ്മദലിക്ക് തന്നെ കൈമാറുമെന്ന് ഡിസംബർ 21ന് തീരുമാനമെടുത്തതായിരുന്നു. ഗുരുവായൂർ ദേവസ്വം ഭരണ സമിതി യോഗത്തിലായിരുന്നു തീരുമാനം. എന്നാല്‍ ഥാര്‍ ഇതുവരെ കൈമാറിയിട്ടില്ല. കൊച്ചി ഇടപ്പള്ളി സ്വദേശി അമല്‍ മുഹമ്മദ് അലിയാണ് വണ്ടി ലേലത്തില്‍ പിടിച്ചത്. 15,10,000 രൂപയ്ക്ക് ഥാര്‍ ലേലം പോയതിനു പിന്നാലെ വിവാദമുയര്‍ന്നിരുന്നു. കുടുംബ സമേതം ബഹ്റിനിലുള്ള അമല്‍ മുഹമ്മദലിയ്ക്ക് വേണ്ടി സുഹൃത്ത് തൃശ്ശൂര്‍ എയ്യാല്‍ സ്വദേശിയും ഗുരുവായൂരില്‍ ജ്യോത്സ്യനുമായ സുഭാഷ് പണിക്കരാണ് ലേലംവിളിക്കാനെത്തിയത്. ഭരണസമിതി യോഗത്തില്‍ അന്തിമ തീരുമാനമെടുത്തിട്ടേ ലേലം അംഗീകരിക്കൂവെന്ന് ദേവസ്വം ചെയര്‍മാന്‍ കെ.ബി. മോഹന്‍ദാസ് നേരത്തെ അറിയിച്ചിരുന്നു.