ലോകമാകെ പടര്‍ന്ന് കോവിഡിന്റെ ഇന്ത്യന്‍ വകഭേദം

 

ന്യൂഡല്‍ഹി: ഇന്ത്യയില്‍ ആദ്യമായി കണ്ടെത്തിയ ബി.1.617 എന്ന കൊറോണവൈറസ് വകഭേദത്തെയാണ് വൈറസിന്റെ ഇന്ത്യന്‍ വകഭേദം എന്നു വിശേഷിപ്പിക്കുന്നത്. ഇതിപ്പോള്‍ ലോകത്തെ പല രാജ്യങ്ങളിലും സാന്നിധ്യം അറിയിച്ചുകഴിഞ്ഞു. ഇന്ത്യയില്‍ തുടര്‍ച്ചയായ നാലാം ദിവസവും പ്രതിദിന കോവിഡ് കേസുകള്‍ മൂന്നു ലക്ഷത്തിനും മരണസംഖ്യ രണ്ടായിരത്തിനും മുകളിലാണ്. എന്നാല്‍, പുതിയ വൈറസ് വകഭേദം മുന്‍ഗാമികളെ അപേക്ഷിച്ച് എത്രമാത്രം കൂടുതല്‍ അപകടകാരിയാണെന്ന് ഇപ്പോഴും വ്യക്തമായിട്ടില്ല. ബ്രിട്ടനിലും ദക്ഷിണാഫ്രിക്കയിലും ബ്രസീലിലുമെല്ലാം കണ്ടെത്തിയ വകഭേദങ്ങള്‍ കൂടുതല്‍ വേഗത്തില്‍ പടരാന്‍ ശേഷിയുള്ളവയായിരുന്നു. നിലവില്‍ ജര്‍മനി, ബെല്‍ജിയം, യുകെ, സ്വിറ്റ്സര്‍ലന്‍ഡ്, യുഎസ്, ഓസ്ട്രേലിയ, സിംഗപ്പൂര്‍, അയര്‍ലണ്ട് എന്നിവിടങ്ങളിലെല്ലാം ഇന്ത്യന്‍ വകഭേദത്തിന്റെ സാന്നിധ്യം വ്യക്തമായിട്ടുണ്ട്. രണ്ടു തവണ മ്യൂട്ടേഷന്‍ സംഭവിച്ച കൊറോണവൈറസാണ് ഇന്ത്യന്‍ വകഭേദം. മനുഷ്യശരീരത്തില്‍ പ്രവേശിക്കാനും രോഗമുണ്ടാക്കാനും സഹായിക്കുന്ന സ്പൈക്ക് പ്രോട്ടീനുകളിലാണ് കാര്യമായ വ്യത്യാസം കണ്ടെത്തിയിരിക്കുന്നത്. ഇതര വകഭേദങ്ങളെ അപേക്ഷിച്ച് രോഗബാധയുടെ തീവ്രത വര്‍ധിപ്പിക്കാന്‍ ഇതിനു ശേഷി ഇല്ല എന്നാണ് ഇതുവരെയുള്ള വിലയിരുത്തല്‍.