"ഒക്ടോബര്‍, നവംബര്‍ മാസങ്ങള്‍ നിര്‍ണായകം"​പ്രതിദിന രോഗബാധയില്‍ മുന്നില്‍ കേരളം

കേരളത്തിൽ  പല ജില്ലകളിലും ഐസിയുവും വെന്റിലേറ്ററുകളും കൊവിഡ് രോഗികളാല്‍ നിറഞ്ഞുകവിഞ്ഞതായി മനോരമ ന്യൂസ് റിപ്പോര്‍ട്ട് ചെയ്തു. എറണാകുളം, ഇടുക്കി എന്നീ ജില്ലകളിലെ സര്‍ക്കാര്‍ ആശുപത്രികളില്‍ ഐസിയുവും വെന്റിലേറ്ററുകളും ഒഴിവില്ല. പത്തനംതിട്ടയില്‍ ഐസിയു ഒഴിവില്ല. ആകെ രണ്ട് വെന്റിലേറ്ററുകള്‍ മാത്രമേ ജില്ലയില്‍ ഒഴിവുള്ളു. ആലപ്പുഴ, പാലക്കാട്, വയനാട് എന്നീ ജില്ലകളില്‍ ഐസിയു കിടക്കകള്‍ ലഭ്യമല്ല.

ഐസിയുവിലും വെന്റിലേറ്ററുകളിലും രോഗികളാല്‍ നിറഞ്ഞുകവിഞ്ഞു; സംസ്ഥാനത്ത് കൊവിഡ് വ്യാപനം ശക്തം, ചികിത്സ പ്രതിസന്ധിയില്‍. കേരളത്തിന് ഒക്‌ടോബര്‍, നവംബര്‍ മാസങ്ങള്‍ നിര്‍ണായകമെന്ന് മുഖ്യമന്ത്രി പിണറായി വിജയന്‍. രാജ്യത്ത് ശനിയാഴ്ച റിപ്പോര്‍ട്ട് ചെയ്തതില്‍ ഏറ്റവും അധികം കൊവിഡ് രോഗികളുള്ളത് കേരളത്തിലാണ്. ഡല്‍ഹിയെയും കര്‍ണാടകത്തെയും മഹാരാഷ്ട്രയെയും മറികടന്നാണ് കേരളത്തില്‍ ശനിയാഴ്ച 11,755 പേര്‍ക്ക് കൊവിഡ് സ്ഥിരീകരിച്ചത്. ടെസ്റ്റ് പോസിറ്റിവിറ്റി നിരക്ക് കുത്തനെ ഉയര്‍ന്ന് 17.46 ശതമാനത്തിലെത്തി. രാജ്യത്ത് ഇന്നലെ പതിനായിരത്തിലധികം കേസുകള്‍ റിപ്പോര്‍ട്ട് ചെയ്തത് കേരളം- 11,755, കര്‍ണാടക- 10,517, മഹാരാഷ്ട്ര- 11,416 എന്നീ സംസ്ഥാനങ്ങളാണ്.കൊവിഡ് കേസുകളുടെ എണ്ണം കൂടാനിടയുണ്ടെന്നും ഫലപ്രദമായി പ്രതിരോധം നടത്തിയാല്‍ മാത്രമേ മരണം കൂടുന്നത് ഒഴിവാക്കാനാകൂവെന്നും കൂടുതല്‍ ഡോക്ടര്‍മാരും ആരോഗ്യപ്രവര്‍ത്തകരും കൊവിഡ് ബ്രിഗേഡിന്റെ ഭാഗമാകണമെന്നും മുഖ്യമന്ത്രി അഭ്യര്‍ത്ഥിച്ചു. 

നിലവില്‍ ചികിത്സയിലുള്ള കൊവിഡ് രോഗികളുടെ തോതിലും ദശലക്ഷം പേരിലെ കൊവിഡ് ബാധയിലും കേരളം ദേശീയ നിരക്കിനേക്കാള്‍ മുകളിലാണ്. രോഗമുക്തി നേടുന്നതില്‍ ദേശീയ നിരക്കിനേക്കാള്‍ പിറകിലുമാണ് കേരളം. എന്നാല്‍, മരണനിരക്കില്‍ കേരളത്തിന് ആശ്വസിക്കാം. കഴിഞ്ഞ ദിവസം ടെസ്റ്റ് പോസിറ്റിവിറ്റി നിരക്ക് കുത്തനെ 8.6 ലേക്ക് താഴ്ന്നതിന് സമാനമായാണ് ഇന്നലെ ടെസ്റ്റ് പോസിറ്റിവിറ്റി നിരക്ക് 17 ന് മുകളിലേക്ക് ഉയര്‍ന്നത്.കൊവിഡ് പരിശോധനകളുടെ എണ്ണം വര്‍ധിപ്പിച്ചിട്ടും ടെസ്റ്റ് പോസിറ്റിവിറ്റി നിരക്ക് 10 ശതമാനത്തിന് മുകളിലായതോടെ രോഗം ബാധിക്കുന്നവരുടെ എണ്ണം ഇനിയും ഉയരുമെന്നാണ് സൂചനയെന്ന് മുഖ്യമന്ത്രി പറഞ്ഞു.